3 Monate später... =)

So ich bis mal wieder.... isch zimli lang gange, bisi wieder mal hie drischriebe, aber irgendwie bini nie derzüecho oder wenni mal Zit heiti kä hänis de doch wieder vergässe. Und da ich jetzt en niua Laptop uf zWiehnächte vercho hä, geit als vill gschneller. Mim alte isch eifach immer als sooo lang gange, bis mal offe isch gsi oder bisi uberhöipt äppis hä chene mache. =) Also zerscht mal zur niu Familie (güet so niu isch ja die öi nimme) ;) D'familie isch wirkli super, chenti mier kei anderi Familie vorstelle. Bi miner Akunft em 4. November ischmi der Fröind va ihra cho abhole, der Arnaud. Gat so zur Info die sind zirka scho 6.5 Jahr mitenand zämme. Und der isch wirkli enz nätt. Der cha embiz Ditsch rede und de heder gat so em Afang mit mier biz Ditsch gredet, amal das wanner so het chene. voll luschtig gsi. Ja und de siwer deheime acho und de hetmer öi dMüetter hallo gseit, d'Dominique öi total en liebi Fröi. =) De isch ja nu zander Au Pair da gsi, d'Terrisa die hetmer de em negschte Tag als zeigt, wasi so müess mache iner Familie und wome so d'wichtigschte Sache hie zNizza cha gfinde, oder besser gseit sellti wisse. Tja ei Tag und de häni sozsäge scho alles gwisst was hie so löift iner Familie voll cool. Schi isch de der ander Tag wieder zrug ind USA gange. Ich hä de mine erscht Tag elei gmeischteret und müess säge, ver der Afang isch alles sehr güet gange. :) D'Chinder sind scho vom Afang ah sehr liebi gsi und heint öi meischtens gfolget... Ich hä mich hie eigentli öi zimli schnell ind Familie igläbt, wasi biner erscht Familie nie heiti chene säge. Ja mal gat so zum Hüs ich wohne zimli noch am Meer, sind so 150m vam Meer und so 10 min. z'Füess va hie bis ind Stadt. Isch ächt genial. Und Wohnig isch en zwei Steckigi ime Altbau, aber hie iner Stadt hets eh meischtens nur Altbau ;) ja obena isch so es Ässzimmer, de es Spillzimmer verd Chinder mit allem Seich so wie en Töggelichaschte, en Couch, ehm en riese Fernseher, Nintendo Wii mit der ganz Üsrüschtig ja und Spillini und schuscht nu allerlei Plunder. ^^ de isch da obena es Badzimmer verd Müetter und Chloé, de es WC, Kuchi und z'Wohnzimmer. De geit Stäga embri und de hets unena öi numal es voll genials Badzimmer mit Dusch und Badwanna und dernäbe es WC und de alli Zimmer halt =) Ja mis Zimmer findi voll gemüütlich, isch nit so gross, aber zWichtigschta isch, dassme schich dri wohlfühlt und das machi wirkli... Ja nu gat vli äppis zune Gaschteltere. Öhm, also ich cha wirkli säge, dass ich mich wie es Mitglied va der Familie fühle, schi frägend mi immer obi mit ihne welle mitcho, mit ihne welli äppis spille, wesch es Spill mächent und schi heint öi gseit wenni äppis brüchi oder welle nur säge und jaa häschi ens gäre und ich glöibe schi mich öi *gg*. Ah ja und schi verköift ja so Schmuck und Täsche, de hetschmer doch uf Wiehnächte en Täscha und en Ketti gscheicht, wani sälber hä derfe üsläse... =) öi so zwischedurch scheichtschmer eifach mal so en Ketti, ens toll. Äbe wie gseit, ich wellti Familie nimme wägsle und cha eigentli im Nachhinein öi froh si, häni vaner ander Familie chene hiegah, schuscht wäri mier so äppis güets nie passiert... So vli gat zu mine Üfgabe, wasi hie so iner Familie sellti mache: Em Morge immer Chinder em 7ni wecke, de zFrüestuck gäh, de isch mini Üfgab dWäsch zmache (ohni Bügeln), lüege dass Spillzimmer einigermasse üfgrümt isch, was meischtens öi isch, da Chinder zum Glick öi scho elter sind..., ehm Tisch decke ver zNacht zässe und abrüme und de eifach ver Kuchi bini öi verantwortlich, dass die süber und üfgrümt isch. Jo und im undere Badzimmer lüege dass da öi als in Ornig isch, was eigentli immer isch =) So das wärs eigentli scho wasi so ztüe hä iner Familie... Ab und züe mal gat so es paar Sache gah icheufe oder Sache mache, wasch mer gat sägend aber nur so Chlinigkeite wie zum Bispill äppis ind Wäscherii bringe, oder äppis gah abhole... Also müess säge häs eigentli scho relativ gmietli hie =) Ah ja äppis häni vergässe, dass ich mit de Jungs immer dHüsüfgabe mache. Isch eigentli voll krass, die heint hie mit 8ti scho ens vill Hüsüfgabe finde das ubertriebe und die Schüel isch öi eini vane schwärere und bessere was hie git. Und ich hä eigentli biz Verantwortig uber dHüsüfgabe und tüe öi mit ihne lehre, was nit immer eifach isch... Wieme weiss, weigerent schich Kinder immer ver äppis zlehre oder dHüsini zmache. Findes eigentli scho en grossi Verantwortig wanni da hä, aber findes uf einer Sita öi güet, dass schi mier sooo fescht vertrüwent =) Ah ja und jede Mittwoch heint Jungs frii de tüeni em Morge gwennli nu so swas verd Schüel mache mit ihne, de lüegentsch biz Fernseh und de zMittag gäwer immer ine Mc Donalds gah ässe mit der Grossmüetter und der Chloé und nachher gäwer sie gah Füessball spille und de heintsch nu Handball... So und der räscht vam Tag, das heisst eigentli häni gwennli vam morge we Kinder iner Schüel sind bis em Mabe wesch wieder chäment so halbi füfi, füfi frii. De machi gwennli äppis mit mine Kolleginne, gäwer ind Stadt oder gah Kaffee triche oder schuscht irgendwas, aber so wirkli lengwillig ischmer eigentli nu nie cho. Und jede Mäntag und Donschtag Morge häni ja Schüel. Ah genau und jedes zweit Wuchenend gänt Kiddis zu ihrem Papa und de hä ich vam Fritag morge wesch ind Schüel gänt bis em Zieschtag Mabend wesch vaner Schüel hei chäment Weekend, was eigentli sehr cool isch. Schuscht so wasi hie so mache am Weekend. Wier si hie scho vill Sache gah alüege zum Bispill siwer scho Monaco gsi, zItalie ufem Märt, Cannes, Grasse ja an hüfe Orti und hie chama uberall meh wa gnüeg alüege. Mi trifft öi immer niui Lit, was ächt en Vorteil isch. Ine Üsgang gäwer eigentli öi immer jedes Wuchend hie zNizza, jedoch isch hie meischtens summs scho em 2 em Morge gschlosse, was ver Nizza voll doof isch. Letscht Weekend siwer uf Monaco ine Üsgang gange, was der absolut Hammer gsi isch. De siwer da inen riese Disco gange, isch zwar nit billig gsi aber immerhin isches soo genial gsi. Die het öi wenschon bis em Morge em 5i offe kä. Jaa und de die Lit was da kä het... Voll vill Riichi Lit, alli so voll im Azug oder im Kleid gsi und ja Disco isch grad am Meer gsi also en flotta, riese Balkon hets öi nu kä. *Traumhaft* Im grosse und ganze isch hie zLäbe scho eifach herrlich, also nit vane Lit was hie het, sondern willme zMeer gat vor der Nasa het, nit so chalt, meischtens schöns Wätter und vorallem vill Friizit. :) Also ich gniesse Zit hie uf jede Fall. More is zwar wieder sowitt, dassi wieder ver 2 Wuche Ferie hei gah, wie zWiehnächte öi scho. Aber ich meine we Chinder Ferie heint und die 2 Wuche nit da sind, häni eigentli öi nit gross Luscht elei hie zblibe und de nit wirkli wisse was mache, oder will de mini Kolleginne hie öi miessent schaffe und so, de gahni lieber zrug ine Schnee und da gah Ski und Fasnachtsferie mache. Was zwar sehr schad isch, dass jetzt de scho en sehr güeti Kollegin va Ditschland wieder zrug geit.. :( Mit dera häni immer ens en hüfe gmacht und die het öi hie iner Nechi va mier gwohnt.. aber leider chama da nigs mache, wier hei uf jede Fall Zit mitenand immer gnosse. Und zum Glick häni ja nu anderi güeti Kolleginne hie, die öi lenger blibend.. Mit einera wani öi vill ztüe hä isch janicke, die gsehder öi uf de Fotos. Und die wa äbe Hei geit wäri de d'Jana. :) Ja güet ich gibemer va jetzt ah Mieh, meh hie drischriebe so mind. 1 mal im Monat =) Häbetcha Sorg und bis bald. Bisouxx Bettina

3 Monate später... =)

Alexandre und ich ufem Riiserad

Chloé an minem Wiehnächtsgscheichi üspacke Vadim und Alexandre

Negresco in Nice, da biegi immer ih ver zu minem Hüs.

San Remo (Italy)

Jana, Janike und ich in Ventimiglia (Italy)

Ich in Ventimiglia

z'Wiehnächte in Nizza...

Janike, ich, Jana und Ciara iner American-Bar

Ferrari in Monaco

Cap d'Antibes (magnifique)

NRJ Music Awards 2010 in Cannes

links ufem Rote Teppich der Robbie Williams =)

d'Rihanna

Brandneue News...

Hallo zäme. Äs tüet mer leid, dassemi scho sooo lang nimme gmäldet hä aber in letschter Zit isch zimli vill passiert und bi zimli im Stress gsi. Also zerscht mal zur Familie. Ich hä ja gschriebe, dass die Familie sehr en nätte, erschte Idruck macht, doch äs isch wirkli nur en erschte, einziga und letschte, nätte Idruck gsi. Also Kinder sind sehr lieb gsi und schi heint mi öi scho diräkt mege und ich schi öi. Gastmüetter isch eigentli gäge üssa öi nätt gsi aber sehr en hinerlischtigi. Und der Fröind va ihra naja en Nätta aber öi en Falscha... Ier fräget ew jetzt sicher wieso das ich iner Vergangeheit schriebe. Äs isch eso, dass ich nur 3 Wuche biner Familie in Biot bi gsi. Endi 2 Wucha seit mer Gastmüetter eso ganz nebenbei, dass schi mich nimme cheni brüche, da va ihra der Fröind kei Arbeit heige und eh der ganz Tag nigs ztüe het. So chene är der ganz Hüshalt mache und ufd Kinder üfpasse. So sige ich überflüssig. Das sige nur üsagschosses Gäld und ja. Das isch en rächta Schock gsi em Afang, will ich bi nu nit lang da gsi und ja de seitschmer das. Ich meine die Trucka heiti das apa scho vor dene 3 Wuche gwisst, dass va ihra der Liebhaber kei Arbeit het und heiti mich nit äxtra miesse lah cho.. De heiti lieber witter en Familie gsüecht und ja de gätismer jetzt vli öi besser. Naja. Was natirli sehr dumm isch gsi, dass schi mier 1 Wuche bevor daschmer dass alles het gseit, der Ferieplan vane Kinder gäh het und gseit het ah ja ine Herbschtferie heigi ich de öi Ferie 2 Wuche de cheni ich de Heim gah wenni welli und uber Wiehnächte öi 2 Wuche oke häni deich die Flig scho büechet in voller Freid, dassi wieder mal cha Hei gah... und ja Schüel häni öi scho bis endi Juni izahlt... und alles eifach.. Naja so en Klepfa ehrli, eifach alles scho ind Ornig tah und de chuntschmer das cho säge. Also ehrli. Ah genau und de nah der endi 2 Wucha häneschi de gfrägt, nachdem daschmer het gseit ich sige uberflüssig, obi de wenigschtens nu bis em 24 Oktober cheni bi ihne blibe, dassi bis de en niui Familie chene süche und de wägem Flug öi willi de Hei wäri gange. De meintsch eso ah ja sicher das sige kein Problem. Va wäge kein Problem... 2 Täg später seitschmer eso eh ich sellemi mal erkundige wäge Hostels de ischmer de schnell klar worde wasch eigentli will. Und ei Tag numal später hetmer va ihra der Freund gseit ah ich selli bis em Wuchenend drüs si, will de va ihra Müetter chäme und schi der Platz und Zimmer brüchi... Naja weisch de chatsch de das mier nit mal sälber säge, feige das da... De häni 2 Meglichkeite kä: d'erschta wäri gsi, dassi vorübergehend ines Hostel gah und va da en niui Familie süche, aber nit wisse wie lang dasses geit bisi eini gfinde.. Cha 1, 2 Täg gah, 1 Wucha, 1 Monat mi weisses nit. Aber bis de heiti de gaaanz sicher keis Gäld meh. Und zweit Meglichkeit isch de gsi -> mine Kurzentschluss öi dassi halt em negschte Tag mim negschte Fliger hei gah.. Ja das häni de wohl oder übel öi gmacht. Bi de schlussendli öi froh gsi häni das gmacht. Embiz is ja öi mini Schuld, will ich Familie halt uber zInternet gsüecht hä und nit uber en Agentur gange bi... Naja aber der Fähler machtme nur 1 mal und mi lehrt öi drüs. Isch also nit als ver nigs gsi. =) Bi de em letschte Tag zNizza nu zunera Agentur verbi gange und de häni va dera Unerlage vercho zum üsfille. Derscht Wucha wani wieder iner Schwiz bi gsi häni de öi zallererscht als sorgfälltig üsgfillt, Referänze igholt, en Brief and Familie gschriebe, en Doktercheck gah mache und verschiedeni Sache iverlangt. De 1 Tag bevor ich das alles heiti welle abschicke, verchumi vanera Kollegin wa mit mier zNizza isch ind Schüel cho es E-mail und de hetschmer gschriebe, dass schi us gsundheitliche Grind miessi zrug ind USA gah. Und va ihra Familie süechi jetzt es nius Au Pair. Ja de hetschmer gseit schi heige das alles mitvercho mit mier und frägi mich ob ich dNachfolgeri va ihra welli wärde. Da chama nur säge: Glück im Unglück. Und da schi dFamilie uber en Agentur gsüecht het, häni de mini ganz Bewerbig der Agentur und der Familie chene züeschicke und Familie isch de soo begeischteret va miner Bewerbig gsi, dasch mich als Nachfolgeri vaner Terrisa wellent hä. Äs isch scho nit eifach ver schi, dass schi müess hei gah und äs tüet mer öi wirkli leid ver schi. Aber umso meh bin ich glücklich, dassi so schnell wieder en niui Familie gfunde hä. Und hoffe natirli dasses dizmal besser klappt. Aber ich hä va der Familie scho sooo vill kehrt und unglaublich schi het mer eigentli nigs negativs chene säge und schi isch öi immer sooo zfriede gsi mit der Familie. Ja ich gfröiemi wirkli wieder chene zgah. So jetzt verzellecha biz uber niu Familie. Weiss zwar nu nit gat soo vill, aber das wasi weiss sägecha =) Dizmal bini binera Familie diräkt in Nizza. Schi heint 3 Kinder 2 Büebe wa öi gat nu Zwillinga sind (Alexandre et Vadim) und es Meigji wa 11i isch (Chloe). D'Gastmüetter isch öi wieder gschiede (güet das sind hie eigentli fascht alli) ;) aber die het scho vill lenger en Freund und schi heisst Dominique (46) und der Freund va ihra Arnaud (42). Schi verköift Handtäsche und Schmuck und är het es eigens Unernähme und stellt swas Medizin här. Ja und ind Schüel wärdi witterhin in Nizza gah. Bi de mal gspannt wies iner Niu Familie wird si. =) und wenni ehrli bi scho es bizji üfgregt :) Ja und wasmi de genau als erwarte wird, oder wasi als so ztüe hä und so, dass verzellecha de wenni wieder unena bi. Ah apropo ich gah em 4 November wieder zrug zur niu Familie. Also scho bald und äs geit nimme lang. Hie nu es paar Fotos gat vaner niu Familie. Bis bald und ich vermissecha scho jetzt. d'Gastmüetter d'Kinder der Freund va ihra und Chloé

Die Ankunft...

Sodeli jetzt bin ich öi scho Südfrankrich im schöne Ortji namens Biot. Verzelle ew jetzt gat embiz va miner Akunft hie in Südfrankrich. De bini geschter em halbi 5i z'Genf abgfloge und bi de em 6i z'Nizza acho... der Flug het en halb Stund verspätig kä aber das isch de öi nit so schlimm gsi, will ich de z'Nizza gli nu bis em zwenzg vor 7ni em Mabe hä miesse warte. De ischmi der Kolleg oder Freund(weiss äbe öi nit genau was) ;) va miner Gastmüetter cho abhole. Är heisst übrigens John. Der John isch sehr en nätta gsi und het öi vill mit mier gredet, obwohl dasses sienta nit gat eifach isch gsi als zverstah. :) De siwer nachher hei gfahre zur Gastmüetter der Isabelle und zune Chinder. Bi sehr güet empfange worde und ganz Familie macht eigentli en sehr lieba und nätte Idruck. Öi Chinder heint schich relativ schnell an mich gwennt. (bini hüerre paff gsi) hehe. Ja und hitte em Morge bini em 7ni üf und hei de Chinder em zähni ab 8ti ufe Bus brunge und jetzt müessi nit gross mache, häni biz Zit ver mich, da Isabelle em Morge früeh em 7ni isch gah schaffe und chunt de z'Mittag hei und em Nami tüetsch mer de apa so Sache zeige. Ja gfröiemi eigentli scho was mi hie so als erwartet. Bis bald und obwohl dassi eigentli gat kei Heimweh hä vermissecha alli gli embiz :) P.s. z'Wätter hitte isch hie nit sooo güet. bettina

Der Countdown löift...

Em negschte Mäntag, der 14. September is endlich so witt. Ich wärde ver 9 Monät schön Wallis verlah und gah als Au-pair zunera Familie uf Frankrich. Z'Ortji wanni de bi heisst Biot das isch zwische Nizza und Cannes. Biot isch sehr bekannt ver Glasbläseri. Bi der Familie wan ich bi isch mini Gastmüetter en eleierziehendi Müetter va 3 Kinder. Ich wärde uf 2 Büebe und 1 Meigji üfpasse. Der elteschte isch 10ni und heisst Paul, der zweitelteschte isch 6i und heisst Adrien und z'Meigji isch 4i und heisst Justine. Bis jetzt häni immer mit der Müetter gmailt und häschi gaaanz ehüfe üsgfrägt ja güet schi mich de öi ;) Und schi hetmer de öi Fotos gschickt va ihra, vane Chinder und vam Pool wasch heint ;) Schi macht en sehr nätte Idruck. (hoffe dass der positiv Idruck live öi nu so güet wird si) =) Uf jede Fall gfröi ich mich gaanz fescht und va Nervösität oder Panik isch nu nigs z'merke... zum glick müessi säge :) Ja ich wärde gat nu es paar Bildjini vaner Familie, de Chinder und em Pool dri tüe. So gsehder, wo, wie und mit welem dass ich ine negschte 9 Monät wärde zämme läbe.